Sèks no por ta mas importante ku bo salú
Wak kiko bo ta guli!
13 di mart 2008 - Skibí pa Reyna Joe
Willemstad – Inspektor di remedi di Antia drs. George Vos den un komunikado emití e siman aki a informá ku no ta pèrmití mas pa importá ni kumpra produktonan ku tin den nan e sustansha Yohimbine. Ta trata aki di dos mata originalmente di Afrika kualnan ta Pausinystalia yohimbe i Coryanthe yohimbe di kua ta raska i garna e parti pafó di kaska di e palu i ta usa esaki pa e.o. komo remedi pa ora hende hòmber tin problema pa haña erekshon, pa bahamentu di peso i pa trata depreshon.
Inspekshon di remedi di Antia alertando komunidat kompleto a bisa ku mester paga tinu si e produkto ku nan ke kumpra ta kontené Yohimbine òf otro derivadonan di Yohimbe pasobra esakinan ta produktonan prohibí riba merkado di Kòrsou i di Antia.
No ta pèrmití pues tampoko den niun forma importashon di produktonan ku tin Yohimbine òf otro derivadonan di Yohimbe. I si tin hende ku a kumpra e produktonan aki via di Internèt lo no duna pèrmit pa importashon ke men ku bo ta pèrdè bo plaka.
Hopi hende ku akseso na Internèt awendia ta kumpra produktonan pa stimulá nan mes seksualmente. Espesialmente hende hòmbernan ku ke ta hopi aktivo seksualmente ta trata na yuda anan kurpa ku produktonan ku tin riba merkado (internashonal). Sinembargo ta masha poko hende ta tuma tempu pa nan wak kiko tin di bèrdat den e loke nan ta guli i tambe pa wak kiko ta konsekuensianan di e produkto riba nan kurpa.
Hopi biaha ku un hende haña un problema médiko riba edat mas haltu e no ta kai ariba ku ta pasobra el a usa sierto produkto na hóben ku e ta bira malu. I tristu ta si un hende a usa produkto pa stimulá aktividat seksual ku resultá ku ta nèt e produktonan aki ta bai pone ku riba tèrmino largu e no por haña erekshon mas ke men ku su pénis no ta funshoná mas pa sèks.
Suplemento
Ta bende produktonan ku Yohimbe i derivadonan di Yohimbe tambe den forma di suplemento di alimento. Komo suplemento di alimento ta usa e sustansha aki pa den hasimentu di body building, pa stimulá deseo seksual (hisa libido) i pa hasi e pénis mas grandi. Investigadónan awendia ta duda si e produktonan aki ta duna resultado di bèrdat basá riba investigashonnan intensivo ku nan a hasi.
Si ta probá awendia ku uso di e produktonan aki tin konsekuensia hopi serio pa kurpa i salú di esun ku ta us’é. Algun di e fayonan komprobá dor di uso di e produktonan aki ta ku e ta okashoná malesa di nir, bo por haña atake di kurason i te asta bo por muri. I si un hende muhé na estado usa e produktonan aki e por okashoná problema serio pa e yu den su barika. Tampoko mester pèrmití mucha den desaroyo, esta bou di 18 aña usa produktonan ku Yohimbe.
Inspekshon di Remedi di Antia ta splika tambe ku tin kaso ku dòkter di kas òf spesialista médiko, despues di a hasi debido chekeo médiko, lo por disidí ku tòg ta duna un hende hòmber ku problema pa haña erekshon un remedi ku ta kontené Yohimbine òf otro derivadonan di Yohimbe.
Ke men ku ta únikamente riba òrdu di dòkter i ku un resèpt por haña e remedi aki na botika. Tur otro forma di hañ’é ta ilegal i ke men kastigabel pa lei.
E desishonnan aki di Inspekshon di Remedi ta tumá na benefisio di salú di tur hende; ke men si bo ke usa e produktonan aki tòg, bo sa despues di e aviso aki ku bo ta tumando riesgo ku bo salú.
Siguiendo ehèmpel di Hulanda Inspekshon di Salú Públiko di Antia a disidí, pa no pèrmití mas importashon di produktonan ku ta kontené e sustansha Yohimbine òf otro derivadonan di Yohimbe. Importashon di remedi ku ta kontené yohimbe dor di botika òf importadó di remedi, ta keda posibel.
E remedinan aki ta optenibel únikamente ku resèpt. Lo no duna pèrmit pa importashon na niun otro persona òf instansha. Asina ta pues, paga bon tinu. Si bo ta duda kiko tin den un produkto ku bo ke bestèl òf kumpra ora bo ta den estranheria; no kumpr’é!
Pa esun ku ta interesá di kon a tuma e desishon aki na Kòrsou i na Antia, por lesa e dekreto di Hulanda riba e website:
http://www.rivendell.eu/library/documents/wetten%20kruiden/Wijz-WWbesl-kruidenpreparaten(yohimbe)10-05-2007.pdf
I si bo tin pregunta i bo ke haña mas informashon na Kòrsou por tuma kontakto ku ofisina di Inspekshon di Remedi, na number di telefòn 599-9-466-9366 òf e-mail na IVG@gov.an
Finalmente
Si un hende hòmber ku ta hóben i salú ke yuda su kurpa pa loke ta erekshon i funshonamentu seksual lo ta mihó pa e yuda su mes di e siguiente forma:
- Tene un mente positivo
- Kome salú
- Sosegá bon, ke men drumi sufisiente
- I sòru pa bo ta den un relashon seksual/amoroso responsabel i sano.
Tur esakinan ta pone ku di mes bo funshonamentu seksual lo ta bon sin ku bo mester di niun yudansa artifisial.
Pa kualke
pregunta/reakshon riba e artíkulo aki por komuniká ku nos na info@seksualidat.com.
Bishitá: