Bonbiní na seksualidat.com.

7-12-2007

No ta fásil pa definí, papia òf pa atendé ku seksualidat. Seksualidat ta un parti di bo personalidat, bo identidat, mará na bo normanan i di bo kultura. Seksualidat ta keda disidí pa bo pensamentunan seksual, bo deseonan, bo fantasianan i bo eksperensianan di kiko ta eksitábu òf no.
Seksualidat ta un forsa poderoso ku ta laga nos ekspresá emoshon pa un otro hende i e ta loke ta stimulá nos pa ke i por prokreá.
Atrakshon na un otro hende no mester ta algu seksual. Nos por ta atraé na un hende pa su manera di hasi, kon prèt e ta, kon sosial i kon inteligente. Despues di esaki por sigui un atrakshon seksual (den kuadro di bo seksualidat) ku ta resultado di e promé reakshon ku tabatin riba un otro hende.
Tin momentu i situashon ku un hende tin di kamuflá sierto parti di su seksualidat. Un hende por tin deseo seksual pa un amigu òf famia pero no por papia di esaki pasobra e sa ku e deseo aki no ta algu akseptá den su ambiente kultural, pais òf organisashon.
Otro hende tin deseo i fantasia seksual pa un hende di mesun sekso kuné pero no ta bai eksplorá esaki ni ta òf por diskutié ku niun hende.

Tur hende a òf ta yega na un punto kaminda ku nan ta bai disidí nan seksualidat. Por ta hopi difísil pa sierto hende bisa kiko nan seksualidat, deseonan seksual i preferensianan seksual ta. Rason pa esaki por ta bo edukashon estrikto religioso i komunidatnan no tolerante pa loke nan ta konsiderá di no ta normal.
Bo seksualidat ta bira visibel na momentu ku bo skohe un partner den bo bida. I preshon di famia, sirkulo sosial, trabou i pais por pone ku un hende ta skohe un partner ku e no ta sinti ku ta ku esei e ke kompartí un bida. Pero kon bo ta bai bisa bo famia den sierto kaso ku bo ta preferá un partner di mesun sekso riba unu di otro sekso?

Pensa un ratu riba bo seksualidat pa bo sa, pa bo mes, kon bo ta definí bo propio seksualidat. Hende di tur edat, mucha, hóben te bieu, por tin problema ku atendé ku nan seksualidat. Esaki pa motibu di balor i restrikshonnan ku ta sali di nos kultura, desendensia, edat i posishon sosial. Pero pa evitá mal komprondementu, ku espesialmente hóbennan ta bira víktima di ignoransia seksual, ta bon pa papia i sigui papia riba seksualidat i pa duna informashon bon i sano riba tur aspekto di seksualidat i di sèks.
Ta p’esei tin awor www.seksualidat.com na papiamentu. Nos meta ta pa ku seksualidat.com duna bon informashon na mucha muhé i mucha hòmber i hende muhé i hende hòmber di tur edat, klase, religion i preferensia seksual saliendo for di kultura i kustumbernan na Kòrsou.
Dunando e informashon seksual na papiamentu nos ta spera di por hasi bon informashon riba sèks mas aksesibel pa tur hende.

I si bo tin kualke pregunta  djis manda un e-mail na info@seksualidat.com i nos ta sòru pa bo pregunta keda kontestá òf nos ta referíbu na un instansia òf persona ku lo por kontestábu mas lihé posibel.

E TIM DI SEKSUALIDAT.COM