Bon pa sa!

Den e sekshon aki nos ta duna abo tep pa kon protehá bo mes i bo seksualidat. I pa bo sa dikon bo no ta laga niun hende ponebu hasi loke abo no ke!

6 di yüni 2008

Peliger digital
©www.seksualidat.com

Resientemente tabatin un kaso na Merka kaminda un mucha hòmber di 17 aña a pone potrètnan sunú di su eks frei di 15 aña riba Internèt. Investigashon polisial a pone ku a arestá e mucha hòmber kende a atmití ku ta pasobra e mucha muhé a kibra kuné el a manda e potrètnan pa su amigunan riba Internèt. A splik’é ku ta pornografia esaki ta pasobra e potrètnan tabata asina pisá, ku nan ta kualifiká komo pornografia brutu.
E mucha hòmber a bisa ku e no tabata sa ku mandamentu di potrèt sunú riba Internèt ta ilegal i kastigabel pa lei. Pa kolmo ta e mucha muhé mes a yega di saka e potrètnan aki ku su mes kámara pa manda pa e mucha hòmber ku e tempu ei tabata su frei.

Konfiansa
Hopi hende no ta realisá peliger di mandamentu di potrèt riba Internèt. No únikamente potrèt sunú, pero tur potrèt mes. Den  kaso di potrèt sunú mester kòrdá ku ta bin duda den un hende su seriedat si e mes ta saka potrèt sunú di su mes òf si e ta pèrmití otro hende saka su potrèt sunú.
Tin hopi ehèmpel di artistanan famá i te asta mucha muhénan ku a sali miss i mester a pèrdè nan titulo na momentu ku un eks frei a presentá ku potrèt sunú di nan.

Tur hóben mester kòrdá ku si presentá potrètnan sunú di bo ku esei por daña bo nòmber, bo futuro i si bo haña un bon trabou por ponebu pèrdè e trabou ei tambe. Pues: simplemente no saka ni laga niun hende saka potrèt sunú di bo.
©www.seksualidat.com

Bon rason pa no hasi sèks sin kondon

©www.seksualidat.com

Bo kasá òf partner ta fiel na bo? Kon bo sa ken ta e otro hendenan ku bo kasá òf partner tin relashon seksual kuné? Un investigashon hasi resientemente na Merka a mustra ku den mil hende ku konosé otro tin por lo ménos 4 ku tin mesun partner seksual. Ke men ku kuater hende ta drumi ku mesun hende ku chèns ku un òf mas di e kuaternan no sa di otro.
Esaki ta rason pa tur hende ku tin un partner òf kasá mester ta konsiente ku si e partner òf kasá ta drumi ku otro hende tambe, ku nan chèns di haña malesanan venériko òf AIDS ta hopi mas grandi ku nan por imaginá.
Pasobra si e hende ku ta drumi ku kuater hende den mesun periodo di tempu no ta kuida su kurpa, e ta trese enfermedat ku e haña den un di e relashonnan parotin, pa abo ku ta su partner òf kasá.

E informashon aki ta pone ku tur hende ku ta serio ku nan mes i ku nan kurpa no mester ta ignorante i kèns pa konfia nan partner i kasá sin mas. Ke men si bo tin duda i bo ta keda tòg ku e partner òf kasá, bo mester ban serio i eksigí di dje pa e usa kondon òf no hasi sèks kuné.
©www.seksualidat.com

Bo mes tambe tin un informashon ku ta bon pa sa?
Mand’é na info@seksualidat.com